World Missionary Press

Devaxim Pavoita Ti Vatt - Goan Konkani

DEVAN AMCHI PRITHUM' ANI JIV —1
PRANN ASLOLEM SOGLLEM ROCHLAM

"Orombak Devan sorg ani prithum' rochli." –Utpot'ti 1:1

"Sorgar ani prithumer aslelem sogllem Tache [Jezu] vorvim rochlam...." –Koloskarank 1:16

"Sorg ani prithum' Rochnnar SORVESPOR tumcher axirvad ghalum. Sorg SORVESPORACHO vortovta; Punn prithum' Tannem mon'xakullak dilea." –Stotr 115:15,16

Devan prithum' mon'xak dil'li tedna ti sopurnn asli. Kitem-kat ghoddlem te vixim mhaiti
gheunk hi pustika vach.

DEVAN AMKAM ROCHLEANT —2

"Uprant Devan mhonnlem, ‘Amchea rupkaran ani Amchea sarkheacho monis Ami rochum-ia; Soglle prithumer...taka sot'ta asumdi....'" –Utpot'ti 1:26

MONIS EK JIVO PRANNI ZALO —3

"Ani SORVESPOR Devan bhuimche dhullintlo monis rochlo ani tachea nakpuddiani jivitacho svas ghatlo; ani monis ek jivo pranni* zalo." –Utpot'ti 2:7

"Ani SORVESPOR Devan mhonnlem, ‘Dadleak eksuro ravop hem sarkem nhoi; Hanv taka ek sangati kortolom....' Ani SORVESPOR Devan Adanvacher ek sust jem' haddli ani to nidlo; ani tachi ek bor kaddun to bhag aslo toso porot zoddlo. Uprant bor kaddleli tachi SORVESPOR Devan ostori rochli ani tika dadleaxim haddli." –Utpot'ti 2:18, 21, 22

*Jivo Pranni mhollear ami khoim-tori sasnnak astele.

ADANVAN ANI EVEN DEVACHI ADNEA MODDLI —4,5

Soitanacho tallo ami aikunk favonam.

"Uprant Eden bagecho samball korunk, Sorvespor Devan mon'xak thoim nemlo. Ani Sorvespor Devan mon'xak oxem formailem, ‘Bagentlea soglleam rukhanchem foll tujean khaum ieta; Punn borea ani vaitta vixim ginean ditelea rukhachem foll tum khaumnaka; karann jea disa tum tem khaxi, tum nischit mortoloi.'" –Utpot'ti 2:15-17

SOROP, ZAKA DEVCHAR VO SOITAN MHONNTAT, TANNEM DEVACHEA ODHIKARA VIXIM VAD KELO, ANI FOTT MARLI.

"Ani sorpan ostorek mhonnlem, ‘Tum khorich morchinaim.' Tor tea rukhachem foll khaunk borem, disunkui borem ani je vorvim mon'xan budhvont zaum ieta mhonn bailen pollelem tedna, tinnem tem kaddlem... ani khalem. Tinnem aplea potikui dilem...ani tannem-i khalem." –Utpot'ti 3:4, 6

ADANV ANI EVA BAGENT ANIK RAVUNK XOKLINANT —6

"...Je zom'nintlo taka rochlolo tech zom'nichi kamais korunk SORVESPOR Devan taka Eden bagentlo bhair ghalo...Jivitachea rukhaxim pavoita ti vatt rakhunk, Tannem...ek devdut dovorlo...ani ek bhogbhogit torsad dovorli." Utpot'ti 3:23, 24

ADANVAN ANI EVEN PATOK ADARLEM TEDNA —7
MON'XAKULLAK TO EK DUKHEST DIS VORTOLO

"...Eka mon'xa vorvim patok sonvsarant ailem, ani patka vorvim moronn ani oxem moronn sogllea mon'xakullacher ailem...." –Romkarank 5:12

Ugddas Dhorunk
Dor ek monis patki soimban zolmota, ani ek dis mortolo, kiteak moronn patka udexim ailem. (Romkarank 5:12-Novean Vach.)

AMKAM PATKANTLIM SODDOUNK APLEA EKLEACH —8
PUTAK PATTHOUNK DEVACHI IEVZONN VORTOLI

"Ani ti ek put prosut zateli ani tum Taka JEZU hem nanv dovortoloi, kiteak To Aple porjek tanchea patkantlim soddoitolo." –Matev 1:21

"Tor Tache [Krist Jezu] thaim Devponnachi purnn bhorti kuddichea rupan vosti korta." –Koloskarank 2:9

Mon'xakullant ieuncheak Devachea Putak mon'xa-ballok zaun ieuncho poddlo.

MON'XA RUPAN — JEZU DEV ZAUN ASA —9

"Orombak Sobd aslo ani Sobd Deva sovem aslo, ani Sobd Dev zaun aslo...Ani Sobd monis zalo ani amche modem jielo...." –Zuanv 1:1, 14

"Hi bhaknni pallun ieunche khatir hem sogott ghoddlem...: ‘Polle ek ankvar gorbhest zateli ani ti ek Put prosut zateli ani te Taka ‘Emmanuel' nanv dovortele zacho orth, ‘Dev amche thaim.'" –Matev 1:22, 23

"Amche sorim ek Ballok zolmola, amkam ek Put dila; ani Rajkarbar Tacher thartolo. Ani Taka Ojeapvont, Budh-divpi, Soktivont Dev, Sasnnik Bap, Xanticho Kunvor mhonntele." –Izaias 9:6

JEZU KRIST — AMCHI SOPURNN BOLI —10

"...Zo patok nokllo aslo...." –2 Korintkarank 5:21

"Zannem patok adarlenam ...." –1 Pedru 2:22

Patok kaddun uddounk mon'xan kel'lo khoinchoch iodn (bhett) SOPURNN naslo.

"Tor paddeanchem ani bokddeanchem rogot patkam kaddun uddounk xokonam." –Hebrevank 10:4

Jezu Devacho Menddro. "Polle! Devacho Menddro, sonvsarachem pap kaddta To!" –Zuanv 1:29b

AMKAM TARONN DIUNCHEAK, JEZUN APLO PRANN DILO —11,12

Khottea mon'xani Tacho dves kelo dekhun Jezuk lankddachea khursar khillailo. Punn Tachem moronn Devachi ievzonn vortovli. Tuka ani mhaka amchea patkantlim soddounk Jezun apkhuxen Aplo prann dilo.

Jezun mhonnlem, "Konnuch to (Mhozo prann) Mhoje lagchean kaddinam, punn to Hanv Mhojech khuxen ditam. Prann diunk ani to porot gheunk Mhaka podvi asa...." –Zuanv 10:18

DEVACHEA MENDDREACHEA ROGTA VORVIM AMKAM SODDOILEANT

"...Bhangar vo rupea sarkelea vinaxi vostum vorvim nhoi... punn khot ani dag naslelea menddrea porim Kristachea omolik rogta vorvim tumchi soddvonn kelea." –1 Pedru 1:18, 19

DUSRO KHOINCHOCH IODN PATOK KADDUN UDDOUNK XOKONAM

"...Jezu Kristachea ekech pavttim kel'lea kuddichea bolidana vorvim amkam sonvskarleant." –Hebrevank 10:10

"...Atam Tachea rogta vorvim amkam nitivont tharaileant, mhonntoch Tache vorvim ami krodhantlim vattovteleanv." –Romkarank 5:9

"Tum Tujea rajeant ietai tedna Dhonia, mhozo ugddas kor." –Lukas 23:42

Hea choran Jezucher bhavarth dovorlo ani tachem taronn zalem.

"...Hanv tuka khorench sangtam, aiz tum Mhoje borobor voikunttant astoloi." –Lukas 23:43

Hea choran Jezucher bhavarth dovrunk nam dekhun tachem taronn zalem nam.

"...Ami patki (Devacheo adnea moddleat) asleanv tedna Krist amche pasot melo." –Romkarank 5:8

DEVACHEA PUTACHER VISVAS DOVOR- —13
TOLEAM SOMESTANK JIVIT MELLTA

"Kiteak Devan sonvsaracho itlo mog kelo, ki Tannem Aplea ekleach Putak vopun dilo, Tacher visvas dovorta tacho nas zainam zauncheak, punn taka sasnnik jivit mellcheak." –Zuanv 3:16

"Tannem amkam kallokhache podventlim soddoileant ani Aplea mogall Putachea rajeant utraileant. Tache sovem amkam Tachea rogta vorvim soddvonn* ani patkanchem bogsonnem asa." –Koloskarank 1:13, 14

*Soddvonn mhonnge amkam viktim gheun porot haddlim.

"TO JIVONT ZALA!" —14

"Punn devdutan ostoreank portipall korun mhonnllem, ‘Bhieum nakat, khursar khillail'lea Jezuk tumi sodtat mhonn hanv zannam. To hanga na; kiteak Tannem sanglelea, pormonnem To jivont zala. Taka nikhipil'lo ti svat ieun polleiat.'"–Matev 28:5, 6

JEZU MEL'LEANTLO NOVEAN JIVONT ZALO —15

"Hanv mel'lom, punn Hanv jietam ani polle Hanv sasnnak jivo asam, Amen. Emkonddacheo ani Mornnacheo chavio Mhoje lagim asat." –Prokasnni 1:18

"...Hanv jietam dekhun tumii jietele." –Zuanv 14:19

Kristan mornnacher zoit vhelem, ani mornnacheo chavio Tache lagim asat dekhun ami mornnak anik bhieumchi goroz nam.

"Hanv bhietam tedna, Tujer hanv visvastolom." –Stotr 56:3

JEZUCHEAN TUKA TARONN DIUM IETA ANI TO TUJE PASOT PRARTHON KORTA

"Punn To sasnnak jieta dekhun...Tache vorvim Devaxim ietat titleankui To xevott porian [sompurnn] taronn diunk xokta, kiteak tanche pasot vinoti korunk To sasnnak jieta." –Hebrevank 7:24, 25

TUJEAN ANI MHOJEAN SASNNIK JIVIT MELLUN GHEUM IETA —16

Tum khoincho mhonn rosto dhortai?

SASNNIK JIVIT
Jezu Krist, Deva thaim melltolea sasnnachea JIVITACHI VATT vortota.

Devchar (Soitan) sasnnachea MORNNACHI vatt vortota.

SASNNIK MORONN

Sasnnachea jivitak pavoita ti vatt, ho bhurgo vinchun kaddta.

TUM KITEM MHONN VINCHUN KADDTOLOI? —17

"...Tumi konnachi seva kortele tem aiz vinchun kaddat...." –Jozue 24:15

"...Tea pasot tuka ani tuje sonstik jivit mellche khatir, jivit vinchun kadd." –Dusri Somurt 30:19

JEZU SASNNACHEA JIVITACHI VATT

"Anik konnachech sovem taronn na, kiteak mon'-xachem taronn zauncheak mollba tolla mon'xam thaim anik nanv na." –Prexitanchim Kortutvam 4:12

"Hanv, hoi Hanv To SORVESPOR, ani Mhoje bogor anik dusro Tarok na." –Izaias 43:11

SASNNIK JIVIT ZAI ZALEAR AMI JEZUK —18-23
KITEAK VINCHUN KADDUNK ZAI?

1. Krist ailo.
"...Tankam jivit mellcheak Hanv ailam...." –Zuanv 10:10

2. Kristan ki amcho mog kelo ani To amche pasot melo.
"...Devachea Putan...mhozo mog kelo ani mhoje pasot Tannem Aplo prann dilo." –Galesiekarank 2:20b

Jezu amche porim rogta-masacho monis zalo. "Mornna vorvim mornnacher podvi choloita tacho, mhonnge devcharacho bhosm korche khatir, ani, mornnache bhirantin sogllea aplea jivitant bandpasant sampoddleleam somestank suttka diuncheak." –Hebrevank 2:14,15

3. Amchea patkank ekuch upai mhollear Jezuchem rogot.

"...Rogot mon'xa pasot farikponn [bogsonnem] dita." –Levi Xastr 17:11

"...Tachea Putachem–Jezu Kristachem rogot sogllea patkantlim amkam xud'dh nitoll korta." –1 Zuanv 1:7

"Zache sovem Tachea rogta vorvim amkam soddvonn [taronn], patkanchem bogsonnem asa." –Koloskarank 1:14

4. Krist mel'leantlo jivont zalo.

"Zanno zaun Krist mel'leantlo jivont zalo dekhun To anik moronam. Mornnak anik Tacher sot'ta [raj-podvi] na." –Romkarank 6:9

"Ani To soglleam khatir melo, ki jietat tim anik apnna pasot jieuncheak nhoi, bogor Tache khatir, Zo tanche khatir melo ani punorjivont zalo." –2 Korintkarank 5:15

Jezun mhonnlem, "...Hanv jietam dekhun tumii jietele." –Zuanv 14:19

5. Sasnnik jivitak utorcheak, novean jivont zauncheak [sasnnak jieuncheak] amche thaim Kristacho Atmo asunk favo.

"Krist tuje thaim, mhoimecho bhorvanso." –Koloskarank 1:27

"Punn Jezuk mel'leantlo jivont kelo, Tacho Atmo tumche thaim vosti korta zalear, Zannem Kristak mel'leantlo jivont kelo To, tumche thaim vosti korte-lea Tachea Atmea vorvim, tumchei vinaxi [soimbik] kuddink jivit ditolo. –Romkarank 8:11

KRISTACHO ATMO TUJE THAIM VOSTI KORTA, HACHI KHATRI KOR

"...Zache sovem Kristacho Atmo na, to Tacho [Kristacho] nhoi." –Romkarank 8:9

JEZU SOGLLEA BHURGEANCHO MOG KORTA

"Ani Tannem tankam Aple vengent ghetlim, Aple hat tancher dovorle ani tancher axirvad ghalo."–Mark 10:16

"Jezu mhozo mog korta mhonn hanv zannam, kiteak Povitr Xastr mhaka oxem sangta."

"Punn Jezun tankam apnna sorim apoilim ani mhonnlem, ‘Supurleam bhurgeank Mhojexim ieumdi, ani tankam addvarum nakat; kiteak sorginchem raj osleanchench." –Lukas 18:16

"Toxench hea lhanantlea ekleacho porian ibadd zal'lo [sasnnak sanddlolo vo nas zal'lo] tumchea sorginchea Bapak naka." –Matev 18:14

Tum konnui zaum vo khoinsorui tum vosti korum, Jezu tuzo mog korta, ani tuje pasot melo.

Jezu tuzoi mog anvddeta. Tacheo adnea samballun tuzo mog Taka tujean dakhoum ieta.

"Tumi Mhozo mog kortat zalear, Mhojeo adnea samballat." –Zuanv 14:15

"Ek bhurgo koslo to tacheam kortubam vorvim dakhol zata...." –Mhonn'nneo (Opari) 20:11

DEVAXIM PAVOITA TI VATT KOXI MELLUN GHEUMCHI —24-28

1. Tum patki (Devacheo adnea samballunk na) mhonn ollkhun ghe (kobul kor).
"Soglleamni patok adarlam, ani Devache mhoime sorxile koddsorleat." –Romkarank 3:23

2. Jezu Krista vorvim Devaxim ie.
"Kiteak ekuch Dev asa ani Deva ani mon'xam modekot ekuch Modesti asa, To Monis Krist Jezu." –1 Timotak 2:5

"Tea pasot jim konn Tache vorvim Devaxim ietat, tankam To [Jezu] taronn diunk xokta...." –Hebrevank 7:25

Jezun mhonnlem, "...Zo Mhojexim ieta, taka Hanv kedinch bhairaumchona." –Zuanv 6:37

3.Tujeam patkancho poxchatap kor.
(Poxchatap korop mhonnge "patok soddun divpa sarki dukh dhorop.")

"Tumchim patkam pusun kaddunk, poxchatap korat, ani Devaxim vollat ...." –Prexitanchim Kortutvam 3:19

"Sorvespor...amche sorim sosnnikaiecho, konnachoch nas zal'lo Taka naka, punn soglleamni poxchatap kel'lo Taka zai." –2 Pedru 3:9

"Zor ami amchim patkam ollkhun ghetanv, tor amchim patkam bhogsunk To visvaxi ani promannik." –1 Zuanv 1:9

4. Tujim patkam Jezu hujir ollkhun ghe.
(Ollkhun ghevop mhonnge ‘ucharop vo kobul korop'.)

25vea panar prarthon kortelea hatancher aslole 1 Zuanv 1:9antlo xlok sokol aslelea vollincher boroi.
__________________________________________________________________________
__________________________________________________________________________
__________________________________________________________________________

5. Tujim patkam soddun di.

"Aplim patkam dhampta to kedinch sukhi zauchonam, punn aplim patkam Deva hujir ollkhun gheta ani tim soddun dita, taka doia mell toli." –Mhonn'nneo (Opari) 28:13

"Khotteponna sorxile koddsorat ani Devak manovta tench korat." –Stotr 37:27

6. Jezu Kristacher visvas dovor.

"...Tujea tonddan Jezu Dhoni mhonn tum ucharxi ani Devan Taka mel'leantlo jivont kelo mhonn tujea kallzant thavn tum sotman'xi zalear tujem taronn zatelem." –Romkarank 10:9

"...Jezu Kristacher bhavarth dovor ani tujem taronn zatelem, tujem ani tujea ghorabeachem." –Prexitanchim Kortutvam 16:31

"Tor kurpen, bhavartha vorvim tujem taronn zalam ...; hem Devachem dennem; kornniam vorvim nhoi, ki oxem konnech boddai korcheak." –Efezkarank 2:8, 9

7. Jezu Kristak tujea kallzant ani jivitant svikar kor.

Tujea kallzachem dar tuvench ugtem korum ieta, ani Jezuk bhitor ieunk amontronn dium ieta. Jezun mhonnlem, "Polle, Hanv dara-umbrear ubo asam ani darar martam; zo Mhozo tallo aikun dar ugoddta, Tache bhitor Hanv ietolom ani tache borobor Hanv jeutolom ani to Mhoje borobor." –Prokasnni 3:20

"Punn zannim Taka svikar kelo titleam-i somestank, Tachea nanvacher bhavarth dovorteleank, Tannem Devachim bhurgim zavpak hokk dilo." –Zuanv 1:12

MARGDORXOK PRARTHON —29

Zor tuvem kedinch prarthon korunk na, ani prarthon korunk tuka adar zai, hem prarthon margdorxok koxem tujean vaprum ieta:

Mogall Dhonia Jezu,
Mhojim patkam kaddun uddounk Tum khursar meloi mhonn hanv Tuka dhin'vastam. Hanvem kel'lea ogunni kortubam pasot hanv mafi magtam. Mhojea kallzant io ani sodanch mhojea kallzant Tum vosti kor mhonn hanv Tuje lagim magtam. Mhojem kalliz Tum nitoll kortoloi mhonn hanv Tujer visvastam. Hanv Tuka mhozo Tarok ani Dhoni mhonn manun ghetam.
Tujea nanvan hanv magtam, Amen.

TUJEA KALLZANT JEZU ASLEAR, —30
TUKA SASNNIK JIVIT ASTOLEM

"...Devan amkam sasnnik jivit dilam ani hem jivit Tachea Puta sovem asa. Zache sovem Put asa tache sovem jivit asam...." –1 Zuanv 5:11, 12

"...Zo Mhojem utor aikota ani Mhaka patthoila Tacher bhavarth dovorta...to mornnantlo jivitak utorla." –Zuanv 5:24

Tuji kudd morta tedna tum Sorvesporaxim hajir astai. (2 Korinthkarank 5:8). "...Krist tuje thaim mhoimecho bhorvanso." (Koloskarank 1:27).

Tujim patkam bhogsunk Jezu lagim zor tuvem maglam, ani Dhoni Jezu Krist tuzo Tarok mhonn tuvem Tacher bhavarth dovorla zalear, tujem nanv sokol boroi:

JEZUCHO PATALAV KOSO THIRSANNIN KORCHO —31

Povitr Xastrantle (Devachea Utrantle) xlok dispottim vach ani te patth korun tuka upeogache te kherit xlok tujea kallzant samball. (Hea supurlea pustokant sabar asat.)

"Povitr Xastr Devache sfurti vorvim dilam, ani tem mull-xikxonn [tum sotmantai tem] diunk, chuki dakhoun diunk, sudharnni diunk, promannikponna vixim adnea korunk upkarta." –2 Timotak 3:16

KHOINCHEAI VELLAR JEZU LAGIM PRARTHONA VORVIM ULOI —32

Jivitantlea sogllea borea ghodditam pasot Taka dhin'vas. Tannem tujea jivitant borem tem kelam dekhun, ani Tannem tuka taronn dilam dekhun Tachi vakhann'nni kor. Tuje koslei gorje pasot tum Tache lagim mag. Jezuche nanvim tum prarthon kor.
"...Tache khuxe pormonnem ami kitem-i magit zalear To amchem aikota." –1 Zuanv 5:14
"...Bapa lagim Mhojea nanvan tumi kitem-i magxat, To tumkam ditolo." –Zuanv 16:23
"...Ekameka pasot magat...."–Jakob 5:16
"...Tumkam opman korteleam ani tumkam dhumallo diteleam khatir prarthon korat." –Matev 5:44

JEZUN APLEA XISANK XIKOIL'LEM MAGNNEM —33
(Xis mhonnge Jezucho pattlav korta to monis.)

Jezun he porim aplea xisank magnnem korunk sanglem:

"Amchea Bapa Tum sorgar asai, Tujem nanv vhodd povitr zaum. Tujem raj amkam ieum. Tuji khoxi sorgar zata toxich sonvsarant zaum. Amcho dispotto gras aiz amkam di. Amcher patok korteleank ami bhogxitanv toxem Tum amchim patkam bhogos. Ani amkam tallnent poddunk dium naka, punn odruxttantlim amkam nivar: kiteak raj ani podvi ani mhoima Tujich sasnnachea sasnnak. Amen." –Matev 6:9-13 (KJV)

Hem magnnem patth korunk zai. Bhavarti zaite pavtt sangatan ekttaim zaun hem magnnem vhoddlean kortat.

DEVACHEO DHA ADNEA AMI KOXE —34,35
PORIM JIEUNK ZAI TEM XIKOITAT
(Suttka, 20vo avesor)

Ami Devacho mog korop, he vixim poileo chear adnea
1. "Mhoje bhair anik dev tuka asum nhoie."
2. "Tuje khatir korantun koslich protima (murti) vokiteachench chitr korum nhoie....Tankam bho-zum nhoie, na mhonn tanchi seva korum nhoie."
3. "Tujea Sorvespor Devachem nanv vyorthan ucharum nhoie."
4. "Sabbath dis tuvem povitr dovorcho."
Xevottache sov, ami mon'xancho mog korop he vixim asat

DHA ADNEA (FUDDEM)
5. "Tujea avoi-bapaik man di."
6. "Tuvem jivexim marum nhoie."
7. "Tuvem prodvar korum nhoie." (Prodvar mhonnge poti vo potinn ekamekak lognsombondim visvaxi na ravop.)
8. "Tuvem chorum nhoie."
9. "Tujea pelea add tuvem lottik govai dium nhoie."
10. "Tujea peleache koslech vostuchi axea...tuvem korum nhoie."

DEVACHEO ADNEA SAMBALL'LEAR AMKAM AMCHEA MAGNNEANK ZAP MELLTA

"Ami Tacheo adnea samballtanv ani Taka manovta tench kortanv dekhun ami Tache lagim magtanv titleim amkam Tache lagchean mellta." –1 Zuanv 3:22

DON XREXTT ADNEA —36

Devacho mog korop

1. "Jezun taka mhonnlem, ‘"Sogllea tujea kallzan, sogllea tujea jivan (prannan), ani sogllea tujea monan tujea Sorvespor Devacho tuvem mog korcho." Hi poili ani xrextt adnea.'" –Matev 22:37, 38                                                                     MOG

Mon'xancho mog korop

2. "Ani dusri tachech porim asa: ‘Tum tuzo mog kortai tosoch tuvem tujea peleacho korcho.'" –Matev 22:39

Soglleo dha adnea (pan 34 ani 35) heam don xrextt adneancher     tharleleo asat.

MOG SOGLLEAM POROS XREXTT —37,38

Vorto "Mogacho Avesor"
(1 Korintkarank 13:1-8, 13)

¹Hanv mon'xancheo ani devdutancheo bhaso uloin, punn mhaka mog na zalear hanv eke vazte pitlli vo eka vaztea kansallea sarko zalam. ²Ani zor mhaka bhakit korpachem dennem asa, ani soglle gutth ani soglli zannvai hanv somzotam (atthaptam), ani mhaka sogllo bhavarth asa je vorvim hanv dongor kaddun uddounk xoktam, punn mhaka mog na zalear hanv kainch nhoi. ³Ani zor hanv mhojeo soglleo vostu kaddun dublleank diin ani mhoji kudd lasunk diin, punn mog na zalear mhaka kainch adavachem nhoi. ⁴Mog sogllem sosta, ani mog doiall; mog nattkai korinam; mog boddai dakhoinam, gorvan fulonam; ⁵opmanan vagoinam, aplench sodina challovna, kainch vaitt chintinam; ⁶vaittan sontosbhorit zainam, punn sota thaim sontosta; ⁷sogllo bhar gheta, sogllem sotman'ta, soglleachi opekxa korta, sogllem sosun gheta, ⁸mog kedinch harona, punn zoim bhaknneo asat teo sorteleo; athveo bhaso asat teo sorteleo; ginean asa tem nopoit zatelem. ¹³Ani atam him tin vostat bhavarth, bhorvanso, mog; punn hantlo xrextt mhollear mog.

DEV MHOLLEAR MOG
"...Dev vortota mog, ani zo mogan jieta to Deva thaim jieta, ani Dev tache thaim." –1 Zuanv 4:16

HERANK TUVEM GOVAI DIL'LI JEZUK ZAI —39

(Ghorant, Xallent, Povitr Sobhent, soglle svater)

Jezun mhonnlem, "Tujea ghora voch, tujea ixttanxim vochun Sorvesporan tuje sorim koslim xrextt kortutvam keleant, ani tuji koxe porim doia kelea te vixim tankam sang." –Mark 5:19

DEVACHEA EKA NIZ BHURGEAK KOSO OLLKHUNCHO —40

"Tumi ekamekacho mog korxeat zalear tumi Mhoje xis mhonn soglleank kolltelem." –Juanv 13:35

"Punn Atmeachem foll vortota mog, sontos, xanti, sosnnikai, doia-moia, boreponn, visvaxiponn, dulobai, ap-niontronn...." –Galesiekarank 5:22, 23

"Tum zor mon'xancheo chuki bhogxitai, tuzo sorgincho Bap tuka-i bhogxitolo." –Matev 6:14

SAT OGUNN ZANCHO DEV DVES KORTA

"Ek gorvixtt nodor, fott vinntoli jib, niropradeanchem rogot varoitele hat, odruxtt manddneo ievjita tem kalliz, khotteponn korunk sudsuddit aslole paiem, fott uloita toslo lottik govai, ani bhavam-bhoinnim modem dusongam upzoitolo monis." –Mhonn'nneo (Opari) 6:17-19

PATKI SOIMBACHEO KORNNIO: —41

...Prodvar, ankvaram modem vostolem lingi pozoddponn, murtipuza, ghaddiponn, dves,...krodh, zhogddem, kun'nattkai, khun korop, bebdikai,...ani osle ogunn:...oslem kortat tankam Devachea rejeant daiz mellchenam."
–Galesiekarank 5:19-21 (KJV)

"...Nhoi mhonn som'laingik sombondh dovortele,... nhoi mhonn nagovnne, na mhonn axea dhortele.... –1 Korintkarank 6:9,10

JEZUN TUKA APLEA ATMEAN BHORUN TUKA NITOLL KORUM DI

"Ani osle tumi kaim zann asle, Punn amchea Dhoni Jezu Kristachea nanvan ani amchea Devachea Atmea vorvim tumkam dhuleat...nitoll keleat...ani sonvskarleat [Povitr keleat]...." –1 Korintkarank 6:11

EMKONDD EK KHORI SVAT —42

(Lukas 16:19-26 vach.)

JEZU
Tum Jezu Kristacher visvas dovortai mhonn hachi khatri kor. To Aplea Jivita-Pustokar tujem nanv boroitolo.

"Ani zachem nanv Jivita-Pustokar mell'lem nam, taka ujeachea konddant uddoilo." –Prokasnni 20:15

ADAR DIAT!

DEVA SORIM VECHI EKUCH VATT: JEZU —43

"...Devan amkam sasnnik jivit dilam ani hem jivit Tachea Puta sovem asa." –1 Zuanv 5:11

"Kiteak patkachi mozuri moronn, punn Devachem dennem vortota amchea Dhonia Jezu Krista thaim sasnnik jivit." –Romkarank 6:23

"Zo Putacher bhavarth dovorta taka sasnnik jivit asa; ani zo Putacher bhavarth dovornam to jivit dekhchonam, punn Devacho krodh tacher vosta." –Zuanv 3:36

"Jezun taka mhonnlem, ‘Vatt, Sot, ani jivit Hanvuch. Konnuch Bapaxim iena bogor Mhojech vorvim.'" –Zuanv 14:6

SORG EK KHORI SVAT —44

Prokasnni 21vea avesoran Zuanvan aplea dorxonant ek novo sorg ani novi prithum' polleli.

"‘Tanchea dolleantlem dor ek dukh Dev pustolo; moronn, khont, roddnnem ani dukh anik thoim aschimnant, kiteak adlem sogllem nopoit zalem.' Uprant xinvasonar bosun aslo Tannem mhonnlem, ‘Polle, Hanv sogllem novem kortam....'" –Prokasnni 21:4, 5

Sorgar thavn Deva lagchean sokol denvta tem Povitr Xar, novem Jeruzalem, Zuanvan pollelem.

"...Tem xar nivoll konvche porim os'sol, nirmoll bhangrachem aslem. Xarachea pareacheo buniadi sogllea jinsachea maannkam-motiamni nettoil'leo...." –Prokasnni 21:18, 19

JEZUCHER BHAVARTH DOVORTELEAM —45
KHATIR TO GHOR TOIAR KORUNK GELA

"Tumchem kalliz osvost zaum nhoie; Tumi Devacher bhavarth dovorla; Mhojerui bhavarth dovrat. Mhojea Bapachea ghorant dobajean nettoil'leo sabar svato asat; oxem naslem zalear Hanv tumkam sangtolom aslom. Tumche khatir svat toiar korunk Hanv vetam. Ani zor Hanv vochun, tumche pasot svat toiar korin zalear, Hanv porot ieun tumkam Mhojexim ghetolom; ki oxem zoim Hanv asam thoim tumii ascheak." –Zuanv 14:1-3

HI BORI KHOBOR DUSREANK KOLLOI
Jezun mhonnlem, "Sogllea sonvsarant vochat ani Xubh'vortman sogllea mon'xank porgottat." –Mark 16:15

"...Zo atme jikta to monis xanno."–Mhonn'nneo (Opari) 11:30

APLEAM BHURGEAM PASOT DEVACHEO BHASAVNNEO —46

"...Hanv tumkam kedinch soddcho na, na mhonn sanddchona." –Hebrevank 13:5
"Sogllea tujea vattamni tuka rakhunk tuje voir, To Aplea dutank hovalo ditolo." –Stotr 91:11
"...Mhojea Bapachea hatantlim tankam konnuch kaddunk xokonam." –Zuanv 10:29
"...Hanv tuje borobor sodanch asam, kallacho xevott porian." –Matev 28:20
"Tujer atte-vitte ienvche asat tea vixim tum bhieum naka, Mornnachi ghoddi porian visvaxi rav, ani Hanv tuka jivitacho mukutt ditolom." –Prokasnni 2:10
"Mhaka ulo mar ani Hanv tuka zap ditolom ...." –Jeremias 33:3

JEZU NOVEAN IETA —47

Soglle mel'leantle jivont zatle.

"...Oslo vell ieta jedna somadhimni asat tim sogllim Tacho tallo aikotelim ani bhair sortelim, — zannim borem kelam tim jivitachem punorjivontponn bhogunk, ani vaitt kelam tim nisontonnachem jivit bhogunk." –Zuanv 5:28, 29

Kristachea ekvottant meleant tim poilim jivont zatelim.

"Tedna ami jivim urlelim Kristak mellchea khatir Tache borobor ontrollar kupanim ektovteleanv; Ani oxem ami sodankal Dhonia borobor asteleanv." –1 Thesalonikarank 4:17

"...Zagrut ravat ani pararthon korat, kiteak ho vell kedna to tumi nokllot." –Mark 13:33

JEZU KOSO IETOLO? —48

"Ho polleiat kupam borobor To ieta, ani dor eklo Taka polletolo...." –Prokasnni 1:7

Fottkire Krist ani fottkiream bhaknnaram vixim chotur ravat.

"...‘Polleiat, Krist hanga asa! vo thoim asa!' mhonn konnuii tumkam sangit zalear tumi tem sot'manum nakat...‘Polleiat, To oronneant asa!' oxem te tumkam mhonnot zalear tumi bhair sorum nakat; vo ‘Polleiat, To bhitorlea kuddant asa!' mhonn sanglear tem tumi sot'manum nakat." –Matev 24:23, 26

"Kiteak zoxem zoglavnnem udenti thavn ieun ostomtek marta toxench Mon'xachea Putachem iennem zatelem...Sonvsarantlim sogllim kullam...mollbachea kupancher podven ani vortea dobajean ietelea Mon'xachea Putak dekhtelim...." –Matev 24: 27, 30

GONVLLEACHEM STOTR
(Stotr 23)

¹Sorvespor mhozo gonvlli; mhaka kainch unnem aschemnam. ²Pachvo chorov mellta thoim To mhaka add poddunk dita; xant udkam sorim To mhaka vhorta. ³Mhozo jiv To novsorta, Aplea nanva pasot To mhaka promannikponnachea margan choloita.

⁴Hoi, mornnachi savlli poddlele ghollint legun hanv chol'lear kosleach vaittak hanv bhienvchonam; kiteak Tum mhoje borobor asai; Tuzo danddo ani Tujem konkem, mhaka bhuzvonn ditat. ⁵Mhojea dusmana hujir mhaka vhoddlem jevonn manddtai; Tum mhoji tokli telan makhtai; mhojem patr upott bhoron vot'ta.

⁶Nischit sogllea mhojea jivitant Tuji doia-moia mhoje sorim astelich, ani Sorvesporachea ghorant hanv sodankal vosti kortolom.

If you are interested in receiving additional Scripture booklets, write to the publisher in English at the address below or order online:

World Missionary Press, Inc.
P.O. Box 120
New Paris, Indiana 46553-0120 U.S.A.

World Missionary Press Home Page | Go to the Top of This Page

Hit Counter